Oso harro gaude Euskorporan parte hartzeaz, euskara aro digitalean gorde nahi duen ekimenean. Gure hizkuntzan Corpus Digital bat sortzea funtsezkoa da, euskal gizartea eraldaketa digitalaren esparruan lehiakorra izan dadin, bere nortasunari uko egin gabe. Corpus horrek adimen artifizialaren ereduak trebatzeko balioko du. Lankidetza publiko-pribatuaren bidez, askotan indartsuago egin gaituena, gai izango gara euskararen presentzia bermatzeko, gero eta interkonektatuago dagoen mundu honetan, euskal herritarrei IA beren hizkuntzan erabiltzen ahalbidetuz, eta gure mendeetako hizkuntza euskal kulturaren giltzarri izaten lagunduz.

Gure artean komunikatzeko era eta teknologia erabiltzeko modua erabat aldatu dira. Guztiontzat onuragarria izateko, funtsezkoa da teknologia inklusiboa izatea. Eta benetako inklusioa eta aniztasuna lortzeko, ezinbestekoa da euskara teknologia berrietara integratzea, errealitate berri honetara egokitzeko. Euskaltel Fundazioaren helburuetako bat telekomunikazioen arloan euskal kulturaren aurrerapenean laguntzea da. Euskoporarekin landiketzan aritzea ezinbestekoa ikusten dogu euskara teknologia berrietan integratzea funtsezkoa dela sinesten dugulako, gure hizkuntza eboluzionatu eta garai berrietara egokitzen ari dela bermatzeko.

Euskal Herriko Unibertsitateak ibilbide luzea eta emankorra egin du euskararen corpusa garatzen eta elikatzen, baita ere euskara hizkuntza-teknologiaren abangoardian mantentzen. Euskorpora elkartearen bidez euskararako corpus irekiak lortzen jarraitu nahi du, eta, ikerkuntzan duen lidergoak ematen dion ezagutzaren bitartez, euskarazko hizkuntza-teknologia beste hizkuntzen parean jartzeko estrategian lagundu.

Baleukon, gure funtsezko lanabesa da euskara. Egun, gero eta gehiago, tresna digital eta inteligentzia artifizialak baliatzen ditugu gure egunerokotasunean, eginbeharrak soiltzeko edo hobetzeko. Eta errealitate digital horretan erakargarritasun eta funtzionalitate osoz egoteko gai ez bagara, agian, hizkuntza bat baino gehiago galtzen ariko gara. Beraz, guretzako euskararen corpus digitala sortzea funtsezkoa da gure mundu ikuspegi berezia indartu, eta euskara eremu digital eta teknologikoan garatzen jarraitzeko, gizarte moderno honetan hizkuntza bizia eta garrantzitsua izaten jarraituko duela ziurtatuz eta gure euskal nortasun eta ikuspegiaren berezitasunetik abiatuta munduan lehiakorrak izaten jarraituko dugula bermatzeko.

Hizkuntza-baliabideak modu koordinatuan biltzea funtsezkoa da euskarazko ahots eta hizkuntzako teknologien garapena bultzatzeko. Ingurune digital berrietan euskararen presentzia zaintzeko ardura eta betebeharra dugu, bai eta adimen artifizialeko sistemen eta euskararen zerbitzura dauden hizkuntza-teknologien potentzial guztia aprobetxatzekoa ere.

BBVAn, gure lurrarekiko errotzea erreferente izan da beti benetako aurrerapena ulertzeko. Horregatik, Euskorporarekin bat egiten dugu, euskarak eremu digitalean eta adimen artifizialaren aurrerapenetan paper garrantzitsua izango duela bermatzeko funtsezko ekimena baita. Euskara zaintzeaz gain, gure helburua euskara aukera berrietara eramatea da, mundu digitalean behar duen funtzionaltasuna eta garrantzia emanez.

Euskorporarekin bat egiteak indartu egiten du Deustuko Unibertsitatearen konpromisoa, euskarak aurrean duen erronka handienetako batekin: ingurune digitalean presentzia bermatzea.
Deustuko Unibertsitateak ekarpen garrantzitsua egin dezake euskarazko irakaskuntzan eta materialen lanketan duen ibilbide aitzindariari esker.